مصطفي كامل
عدد المساهمات : 5015
نقــاط المشاركة : 8721
تاريخ التسجيل : 17/08/2010
 |  موضوع: تايتانيك نقابه المحامين - بقلم : سعيد أمين أباظة  السبت يونيو 25, 2011 1:55 am | |
| تايتانيك نقابه المحامين
بقلم : سعيد أمين أباظة
ندوه سعيد أباظه الاسبوعيه المداره فى جزيره القطن !!
موضوع الندوه ... تايتانيك نقابه المحامين وافلاس النقابه !!!
خبران مستفزان مصدرهما موقع نقابه المحامين
الاول : خليفه والدماطى والبهنساوى يدشنون العائمه على النادى النهرى بالجيزه بتكلفه 2 مليون جنيه !!
الثانى : رد شيك من بنك مصر لاحد الزملاء لعدم وجود رصيد فى حساب المعاشات !!
تعليق محامى من جبهه الاستاذ سامح عاشور .... ده سفه وسؤ تصرف واهدار مال عام
تعليق محامى من جبهه الاستاذ حمدى خليفه ..... ده انجاز يحسب للنقيب واعداء النجاح عاوزين يشوهوه ...
تعليق محامى غير منتم لاى جبهه .... عاوز افهم ازاى اشترى عوامه وانا مش لاقى ادفع معاشات ؟ اكيد فيه حاجه غلط ؟
واحد عاقل قوى .... ياجماعه العوامه ملهاش دعوه بفلوس المعاشات .... ده فلوس وده فلوس ثانيه خالص ايه خشخش ده فى ده
واحد عاقل نص نص .... ياعمنا عاوزين نفهم لما الفلوس ده ملهاش دعوه بالفلوس ده تقدر تقوللى نقابه الجيزه جابت ال2 مليون جنيه منين ثمن العوامه ؟
واحد عصبى تنرفز قوى .... ياعم الحكايه مش حكايه فلوس الحكايه سبوبه وراء العوامه !!
واحد من مؤيدى نظريه المؤامره .... الاستاذ عنده حق ارجع لعقد العوامه وشوف اشتروها اذاى ودور على البزنس وهتلاقى وراها عمولات يابا .... فلوس المحامين مباحه لكل من هب ودب واتفرج على الميزانيه لو لقيتها وفهمت منها حاجه !!
واحد ابن حلال قوى .... ياجماعه بلاش عمليه التخوين ده ... الناس عاوزين يمنجهوا المحامين ويخلوا ناديهم على سنجه عشره
واحد مفلس .... ياعم على سنجه عشره والمحامين مش لاقيه اللضى ... عوامه ايه وهباب ايه على راى المثل ..... ملقوش اكل ياكلوه ... جابوا عبد يلطشوه !!
واحد مش عاجبه الوضع .... ياعم خلونا نفرح بالعوامه الاول وبعدين نحزن على فلوسها
واحد جعان عاوز يتغدى .... طيب بالمناسبه ده المطعم اللى فى العوامه الواجبه فيه بكان بالصلاه على النبى ؟
واحد قرفان قوى ..... انا بقول ان المجلس ده بيبعزق فى فلوس المحامين ومش عارف يمشى الامور وافضل شىء اننا نسحب منه الثقه
واحد نقابى اوى ..... ياعم كل شويه يقولولك سحب ثقه سحب ثقه ومش شايفين سحب احنا شايفين جر بس يعنى بيجروونا لتفليس النقابه ....
واحد من انصار صاحبنا .... مفيش فايده فى المحامين كل انجاز لازم يشوهوه الله يكون فى عونك ياحبيبى ونور عنيه يامشبعنا ومهنينا ياحمدى بك ...
واحد من انصار صاحبنا الثانى .... خليكوا وراه لغايه لما يبيعكوا هدومكم وبكره هيخرج على قناه الحياه ويقول على العوامه انا جبت لنقابه المحامين سفينه تايتانيك ... وباقى بس الموزه ونعمل فيلم معتبر هيضرب فيلم تايتانيك وهيكلم عنه العالم اجمع !!
واحد بيفهم قوى قوى ....ياجماعه خلينا فى اصل الموضوع .... البنك بيقول مفيش فلوس فى الحساب هيه فلوسنا راحت فيين ؟ ومين المسئول عن ضياع الفلوس ؟
واحد كان نايم وصحى ... فيه ايه يا اساتذه انتم بتزعقوا ليه ... ماطول عمر النقابه كده تاخد ومتديش ... واحمدوا ربنا على نعمه الستر .... واللى يفيص فيكم ويتوكل على مولاه وروحه تطلع هنبقى نلم له كام قرشين يستروا الست والعيال ولاحاجه للنقابه ... وخليهم يشبعوا بالفلوس ويشتروا عوامه ولا حتى سفينه فضاء ... خربانه خربانه !!
واحد حلال عقد .... ايه رأيكم انا عندى فكره نرهن العوامه وناخد فلوسها نسدد بيها المعاشات ... ويبقى كده حلينا مشكله المعاشات ... وخلينا العاومه نتهنى بيها شويه !!
واحد ثورجى ..... نتهنى ايه ياعمنا انا بقول ناخد بعضنا ونطلع على العوامه نكسروها ونجيب عاليها وطيها او نغرقها عشان يحرموا يبعزقوا فلوسنا !!
حكيم الندوه .... ايه ياعمنا ماهيه فلوسنا برضه عاونا ننتحر بايدينا !!
مدير الندوه .... التوصيات ياجماعه
اولا : الندوه تشجب بشده سؤ تصرف مجلس النقابه فى اداره اموال النقابه والتسبب فى افلاسها
ثانيا : ابلاغ كافه المحطات الفضائيه التى سيذهب اليها النقيب ليدلى بامجاده فيها بان العوامه هى مركب وليست سفينه تايتانيك التى سيدعيها النقيب وتبقى فضيحتنا بجلاجل !!!
ثالثا : ارسل مجموعه من الاساتذه الى السيده زينب والى سيدنا الحسين عشان يلموا كام قرش من المحسنين حوالين المسجدين بالاتفاق مع السيد نقيب الشحاتين فى المنطقتين حتى يتم سد عجز المعاشات ...
رابعا : بدا حمله جمع تبرعات من المحامين المستوريين فى الدنيا حسنه وتستورهم بثوابها فى الاخره للوقوف بجوار زملائهم المحامين فى نكستهم فى نقابتهم واحوال المعيشه اللى اتدهورت ... وهنبدأ من محامين الندوه كل واحد يتفضل مشكورا بدفع اللى يقدر عليه ...
خامسا : الحمد لله لمينا من محامين الندوه خمسه وثلاثين جنيه وخمسه وعشرين قرش بدايه مشجعه !!
سادسا ........ بابا بابا .... بابا بابا ... اصحى اتأخرت على المكتب!!!
ياه .... لما كان حته حلم عجيب فعلا !!! اتخيلت انه حقيقى ..... مصيبه انه يطلع حقيقى ... خلينى افتح النت
ياخبر اسود ده فعلا اشترينا عوامه لنادى الجيزه
ياخبر اسود ده فعلا فيه شيك رجع من بنك مصر
بابا .... بابا .... انت هتنام ثانى ؟
ايوه يابنى غطينى ... مابقتش تفرق اذا كنت نايم ولا صاحى !! خلينى نايم احسن!!؟
المصدر : محامين بلا قيود | |
|
